На 21 октомври, во просториите на Општина Лозово, се одржа едукативна работилница на тема „Превенција за карцином на дојка“, која ја водеше Гордана Митева, докторка по семејна медицина.
Целта на работилницата беше да се подигне свеста за значењето на превенцијата, редовните здравствени прегледи и навременото откривање на карциномот на дојка, како и да се едуцираат присутните за препознавање на можните промени и правилното изведување на самопрегледот на дојките.
Во текот на работилницата, присутните имаа можност да се запознаат со основните информации за карциномот на дојка, начините на негово дијагностицирање и важноста на редовните прегледи. Посебен акцент беше ставен на самопрегледот на дојките како начин за подобро запознавање со сопственото тело и полесно забележување на невообичаени промени, како и на потребата секоја сомнителна промена навремено да се пријави кај лекар.
Карциномот на дојка е сериозно заболување кое во раните фази може да не предизвикува болка или други забележливи симптоми. Токму затоа, не треба да се чека појавата на тегоби за да се побара лекарски совет. Раното откривање овозможува навремено започнување со лекување и ги зголемува шансите за подобар исход. Дополнително, сè поголемото внимание кон појавата на заболувањето и кај помладите жени ја нагласува потребата од информирање, одговорен однос кон сопственото здравје и редовна здравствена грижа.
Преку ваквите едукативни активности се испраќа важна порака дека грижата за здравјето започнува со знаење, свесност и навремена реакција. Отворениот разговор за карциномот на дојка придонесува за намалување на стравот, рушење на предрасудите и охрабрување на жените да го стават своето здравје на прво место.
Оваа активност е дел од проектот „Заедно да превенираме и се бориме против ракот на дојка – 2026“, финансиски поддржан од Локалната самоуправа на Општина Свети Николе.
