На 20.05.2025 година во 19:00 часот, во просториите на подрачното училиште во с. Горобинци, и на 21.05.2025 година во 18:00 часот, во просториите на ОУ „Даме Груев“ во с. Ерџелија, се одржаа едукативни работилници на тема „Кардиоваскуларни болести“. Работилниците беа водени од д-р Гордана Митева, специјалист по семејна медицина.

Содржина на работилницата

На почетокот, д-р Митева го објасни терминот „кардиоваскуларни болести“, кои претставуваат заболувања на срцето и крвните садови.

Потоа беа наведени најчестите типови на кардиоваскуларни болести:

Ангина пекторис – болка во градите поради недоволна снабденост на срцето со кислород.
Аритмија – нарушувања во нормалниот ритам на срцето.
Хронична срцева слабост – намалена способност на срцето да пумпа доволно крв.
Коронарна артериска болест (КАБ) – стеснување на артериите кои го снабдуваат срцето.
Срцев удар (инфаркт) – прекин на дотокот на крв до срцевиот мускул.
Хипертензија (висок крвен притисок) – постојано покачени вредности на притисокот.
Мозочен удар – оштетување на мозочните клетки поради недостаток на кислород.
Периферна васкуларна болест – стеснување на крвните садови, најчесто во екстремитетите.

Симптоми на кардиоваскуларни болести

Присутните беа информирани и за најчестите симптоми:

Болка, стегање или притисок во градите.
Болка, слабост или трнење во рацете или нозете.
Нелагодност во вратот, вилицата, грбот или рамената.
Краток здив.
Брзо заморување при активности.
Промени во срцевиот ритам.
Вртоглавица, зашеметеност или несвестица.
Отекување на екстремитетите.

Дијагноза

Заболувањата се дијагностицираат со лабораториски и инструментални тестови, како што се:

ЕКГ (електрокардиограм),
РТГ (рентген на граден кош),
Ехокардиографија,
КТ и МРИ снимања,
Срцева катетеризација и коронарна ангиографија.

Ризик-фактори

На работилницата беа потенцирани главните ризик-фактори:

Висок крвен притисок,
Висок холестерол,
Дебелина,
Дијабетес,
Недостаток на физичка активност,
Нездрава исхрана,
Пушење и алкохол.

Третман

Третманот зависи од видот и тежината на болеста и може да вклучува:

Промена на животен стил (здрава исхрана, вежбање, непушење, редукција на алкохол),
Медикаментозна терапија (лекови за притисок, холестерол, антикоагуланси),
Механички уреди (пејсмејкер, дефибрилатор),
Медицински интервенции (стентирање, бајпас операција, операција на залистоци).

Превенција

Се разви активна дискусија за превенцијата на болестите. Заклучокот беше дека најважниот чекор е промена на животниот стил:

Редовна умерена физичка активност (15–30 мин. дневно),
Намален внес на сол, шеќери и црвено месо,
Зголемен внес на овошје, зеленчук, риба, немасно месо, јаткасти плодови и растителни масла,
Одржување на нормална телесна тежина.

Овие навики се препорачуваат и за луѓе кои веќе имале кардиоваскуларен настан, како и за оние кои сакаат да го намалат ризикот.

Заклучок

Работилниците беа интерактивни и предизвикаа голем интерес кај присутните, кои поставуваа прашања од различни области.
Целта на работилниците беше учесниците да ги запознаат основните карактеристики на кардиоваскуларните болести: нивните симптоми, компликации, начини на дијагноза, третман и превенција.

Оваа активност е дел од проектот “Заедно да превенираме и се бориме против ракот на дојка-2025, финансиски поддржан од Локална самоуправа на општина Свети Николе.