На 4 август 2026 година, во амфитеатарот во дворот на ООУ „Кирил и Методиј“ – Свети Николе, Организацијата на жените на Општина Свети Николе реализираше работилница на тема „Допирот – анатомија на блискоста“, која ја водеше психологот Емина Петкова.
Целта на работилницата беше на едноставен и практичен начин да се покаже колку се важни допирот, блискоста и човечкиот контакт за нашето расположение, чувството на сигурност и емоционалната благосостојба.
Преку различни вежби и водени активности, присутните имаа можност да дознаат како допирот влијае врз нашето тело и ум, како може да ни помогне да се опуштиме, да ги намалиме напнатоста и стресот и да се чувствуваме посигурно и поврзано со луѓето околу нас. Работилницата покажа дека допирот не е само начин на кој покажуваме внимание, грижа и блискост, туку е и важен дел од нашата потреба за сигурност, разбирање и емоционална поддршка.
На крајот од работилницата, присутните изразија благодарност за споделените информации, практичните совети и можноста преку непосредно искуство да научат нешто ново и корисно за своето емоционално здравје.
Оваа активност е дел од проектот „Заедно да превенираме и се бориме против ракот на дојка – 2026“, финансиски поддржан од Локалната самоуправа на Општина Свети Николе.
