Организација на жените на општина Свети Николе во соработка со Општина Свети Николе, на 28 јуни 2022 година, реализираа Граѓански форум за генерирање на идеи и поставување на приоритети за работа на Локалниот економско социјален совет на општина Свети Николе (ЛЕСС-СВН).
Целта на настанот е да се запознаат присутните со работата на ЛЕСС, да се зајакне и поддржи работата на ЛЕСС-СВН со тоа што ќе се овозможи дијалог на членовите на ЛЕСС Свети Николе со заедницата, односно со сите засегнати страни, да се генерираат идеи и да се направи приоритетна листа на проблеми и потреби на локално ниво кои се планира да бидат вклучени во програмата за работа на ЛЕСС Свети Николе за 2023 година.
На граѓанскиот форум учествуваа преставници од ЛЕСС Свети Николе и претставници од други релевантни институции и граѓански организации.
Форумот го отвори фасилитаторката, каде најпрво беше презентирана целта на форумот и дневниот ред за работа, а потоа се претставија присутните учесници со посебен осврт на тоа која институција или сектор го претставуваат и застапуваат во ЛЕСС Свети Николе. По освртот на фасилитаторката за потребата од ЛЕСС, која е неговата улога, каква е состојбата со ЛЕСС во Македонија, како и соодветни информации за работата на ЕСС на национално ниво, кои се сличностите и разликите, со акцент на спецификите на ЛЕССовите, свое излагање имаше г-ѓа Даниела Арсенова Лазарова – претставничка од оптина Свети Николе, заменик претседателка во актуелниот состав на ЛЕСС Свети Николе. Таа ги запозна присутните со досегашните иницијативи на општината за формирање на ЛЕСС, кои биле проблемите и кои се постигнувањата на ЛЕСС Свети Николе. Соопшти дека актуелниот ЛЕСС е формиран во 2019 година со поддршка на МОТ, со мандат од 4 години, меѓутоа поради корона пандемијата немало состаноци и позначајни активности, освен подготвен деловник за работа. По презентациите се започна со дискусии за приоритетни области за работа на ЛЕССот, а потоа со работа во групи за дефинирање на соодветни решенија и активности за надминување на проблемите во секоја од приоритетните области. За приоритетни области кои се избраа за работа се: инфраструктура, вработливост со акцент на младите, образование и зајакнување на капацитетите на ЛЕСС.
Препораките и произлезените заклучоци од форумот, заедно со приоритетите и предлог решенијата од форумските работни групи понатаму ќе бидат основа за креирање на програма за работа на ЛЕСС за 2023 година.
Оваа активност е дел од проектот „Унапредување на социјалниот дијалог во заедницата“ кој го реализира Младински културен центар од Битола со финансиска поддршка на Меѓународниот центар Олоф Палме од Шведска, а ОЖОСВН е локален партнер за активностите во општина Свети Николе.
